A situación COVID-19 levou ao Concello de Frades a acordar o aprazamento da Festa dos Nosos Maiores 2021, que ía celebrarse o próximo 29 de maio. O Concello lembra que a normativa impide de momento as xuntanzas de grandes grupos de persoas. Non se desbota que a festa se celebre máis adiante este mesmo ano, se a situación o perfmite.
A Festa dos Nosos Maiores é unha homenaxe que o Concello de Frades fai anualmente, por fins do mes de maio, á veciñanza maior de 65 anos. Na última edición ata agora, en 2019, reuniu a máis de 550 persoas na carballeira de San Nicolao. Celébrase dende o ano 1998 e só deixou de facelo coa pandemia.
Dende o Concello de Frades faise un chamamento á veciñanza para que continúe cumprindo con todas as normas sanitarias que trasladan as administracións competentes e lembra que, pesa a que gran parte da poboación xa está vacinada, o virus continúa presente. Así mesmo, o Concello agradece o bo comportamento dos veciños e veciñas do municipio, "o que permite que levemos varias semanas sen que aparezan novos casos positivos".
Comments