Máis dun cento de nenas participan na Gala de Ximnasia Rítmica do Concello de Frades

O polideportivo municipal de Ponte Carreira acolleu o pasado 4 de maio de 2025, a Gala de Ximnasia Rítmica do Concello de Frades, unha xornada lúdica e non competitiva que reuniu a máis de cen ximnastas de seis escolas deportivas da contorna.

As participantes tiveron a oportunidade de amosar os coñecementos adquiridos ao longo do curso, nun ambiente festivo e de convivencia entre escolas. O evento contou coa presenza do alcalde de Frades, Roberto Rey Martínez, e do concelleiro de Deportes, Juan Carlos Portos Bra, que fixeron entrega dunha medalla conmemorativa e lambonadas a todas as nenas.

Os clubs participantes foron: Ximnasia Rítmica Frades, Mesía, Carral, Mórrigan Brexo Lema (Cambre), Mórrigan Vilaboa (Culleredo) e Mórrigan Betanzos, confirmando o crecemento desta disciplina deportiva e o seu impacto positivo no desenvolvemento das máis pequenas.

Dende o Concello de Frades salientan o compromiso coa promoción do deporte de base e a importancia de eventos como esta gala, que fomentan valores como o compañeirismo, o esforzo e a superación persoal.