O Día de Rosalía é unha celebración moi importante para o CPI Viaño Pequeño, de Trazo.Este curso comezaron as celebración dous días antes, o 21 de febreiro, venres. “Apuntámonos á degustación do Caldo de Gloria, unha proposta que partiu da Fundación Casa de Rosalía inspirada no poema “Miña casiña, meu lar” na que a poeta explica como facer un caldo humilde e no que se relata a épica diaria da supervivencia. No comedor escolar, nas quendas de Infantil e Primaria e na de Secundaria, comeron este saboroso prato logo da lectura e recitado do poema. Cada comensal dispoñía do mantel individual deseñado para o evento” informou nunha nota de prensa o educador Ignacio Portela Gómez-Macías.Por mor do mal tempo, adiamos para o xoves 27 de febreiro, cun sol radiante, o canto conxunto da Alborada de Rosalía. Todo o centro, dende Infantil ata ESO, canda o profesorado e persoal non docente, xuntouse no patio central para cantar a peza. Esta proposta parte así mesmo da Casa de Rosalía e mais da Asociación de Gaiteir@s Galeg@s. A letra da Alborada é un longo poema que a autora incluíu no libro fundacional do Rexurdimento galego, Cantares Gallegos. “Como ela di, o máis traballoso foi que ditase exactamente a letra coa Alborada, a melodía coa que os gaiteiros da súa terra abrían o día da festa” apunta o profesor.
Comments