López Campos pon en valor os espazos para a mocidade impulsados pola Xunta en pequenos concellos durante a súa visita a Oroso

O conselleiro de Cultura, Lingua e Xuventude, José López Campos, acompañado pola directora xeral da Axencia Galega de Desenvolvemento Rural, Paz Rodríguez, e a directora xeral de Xuventude, Lara Meneses, visitou o Centro Cívico de Sigüeiro tras ser rehabilitado para reforzar os seus usos e servizos cun investimento da Xunta de 60.000€.

Así, grazas a este proxecto, no que colaboraron a Axencia Galega de Desenvolvemento Rural e a Consellería de Cultura, Lingua e Xuventude, transformouse un espazo que albergaba distintos servizos municipais para habilitar a Casa da Xuventude de Oroso.

Durante a visita, o responsable de Xuventude puxo en valor as accións do Goberno galego para “dotar os pequenos concellos con equipamentos para a mocidade, de maneira que poidamos ofrecerlles un lugar no que desenvolver actividades de lecer educativo e cultural de calidade”, sendo este caso, dixo, “especialmente exemplar pola cantidade de xente nova que reside no municipio“. Neste senso, destacou o compromiso da Xunta “a través das súas políticas transversais, que implican a distintos departamentos, para favorecer os contornos fóra das cidades, e que os seus mozos e mozas conten así cos recursos axeitados para o seu crecemento persoal”.