O PSOE defende en Oroso o investimento do Goberno en Galicia

José Miñones, candidato socialista ao Congreso pola provincia da Coruña, destacou na noite de onte nun mitin en Oroso que “nunca un goberno investiu tanto en Galicia como o liderado por Pedro Sánchez”. “Investimentos que se ven e acción social que se sente, que chegou a cada casa e aos máis de 300 concellos que hai Galicia”, engadiu Miñones no centro cultural de Oroso xunto a Obdulia Taboadela, candidata tamén ao Congreso; Manuel Mirás, ex alcalde de Oroso e candidato ao Senado, e Bernardo Fernández Piñeiro, secretario xeral provincial do PSdeG.

“En dous días temos que reflexionar o que queremos para o futuro, son as urnas e non as enquisas as que deben falar”, destacou Miñones, que lembrou “investimentos que estaban en perigo e o goberno socialista impulsou en Galicia, como o AVE, as intermodais ou as bonificacións para a AP-9”.

Pola súa parte, Taboadela puxo en valor que “somos un partido honesto, con máis de 140 anos de historia defendendo aos que máis axuda necesitan; temos un líder honesto que foi quen de levar a cabo medidas para axudar a toda a sociedade española; os socialistas demostramos que a solución á crise non pasaba pola austeridade, como fixo Rajoy, se non polo gasto social e polas políticas expansivas para protexer aos que máis estaban sufrindo”.

Manuel Mirás ensalzou “a revalorización das pensións, a reforma laboral e os inumerables investimentos dos socialistas en concellos como Oroso”.

“Este domingo imos elixir entre os dereitos dos traballadores, dos pensionistas e das minorías, representados polo Partido Socialista, e os dereitos dos que máis teñen, representados polo PP”, afirmou Bernardo Fernández.

"Nós falamos nesta campaña do que fixemos estes anos e o PP optou por unha estratexia de bulos e mentiras, xa que non queren falar da súa axenda oculta", rematou o secretario xeral provincial.