Recollida solidaria de alimentos en Frades

Cáritas e o Concello de Frades colaborarán nunha campaña de recollida de alimentos para as familias sen recursos do municipio. Esta sétima edición da campaña abrirase, este ano, o vindeiro luns -23 de novembro- e transcorrerá ata o 21 de decembro. Recolleranse alimentos básicos como leite, aceite, azucre, pasta, legumes, arrozo ou conservas, debidamente etiquetados e que non teñan superado nin a data de consumo preferente nin a de caducidade. Como cada ano, haberá seis puntos de recollida, establecidos nos supermercados Loli (Abellá) e Claudio e Tandy (Ponte Carreira), a Cooperativa Central de Frades, o CPI Ponte Carreira e a propia Casa do Concello.

O alcalde de Frades, Roberto Rey, agradece por adiantado “a colaboración tanto da veciñanza como dos distintos establecementos e entidades implicadas neste importante labor, que nos permitirá axudar ás familias máis necesitadas do municipio nestas datas tan sinaladas”.

Durante as cinco primeiras edicións recolléronse uns 400 quilos de alimentos por campaña. Agora, o Concello de Frades fai un novo chamamento á colaboración da veciñanza e pon á súa disposición os teléfonos dos Servizos Sociais municipais (981 69 55 67) e de Cáritas (647 120 228) para resolver calquera dúbida.